Masomo ya Misa: Jumanne ya 14 ya Mwaka, Jumanne, 5 Jula

Somo la Kwanza

Hos 8:4-7, 11-13

Bwana asema hivi: Wamesimamisha wafalme, lakini si kwa shauri langu; wamejifanyia wakuu, lakini nalikuwa sina habari; kwa fedha yao na dhahabu yao wamejifanyizia sanamu, kusudi wakatiliwe mbali. Amemtupa ndama yako, Ee Samaria; hasira yangu imewaka juu yao; siku ngapi zitapita kabla ya hao kupata hali isiyo na hatia? Maana katika Israeli kimetokea hata na kitu hiki; fundi ndiye aliyekifanya, nacho si mungu kamwe; naam, ndama ya Samaria itavunjika vipande vipande. Kwa maana wao hupanda upepo, nao watavuna tufani; nafaka haina bua; machipuko yake hayatoi masuke; hata ikiwa yatoa, wageni watayameza. Kwa kuwa Efraimu ameongeza madhabahu kwa dhambi, madhabahu zimekuwa dhambi kwake. Nijapomwandikia sheria yangu katika amri elfu kumi, zimehesabiwa kuwa ni kitu kigeni. Kwa habari za dhabihu za matoleo yangu, hutoa dhabihu ya nyama na kuila; lakini Bwana hawakubali; sasa ataukumbuka uovu wao, na kuwapatiliza dhambi zao; watarudi kwenda Misri.

Neno la Bwana. — Tumshukuru Mungu.

Wimbo wa Katikati

Zab 115:3-10

K.

Enyi Israeli, mtumainini Bwana.

Lakini Mungu wetu yuko mbinguni, Alitakalo lote amelitenda.
Sanamu zao ni fedha na dhahabu, Kazi ya mikono ya wanadamu.

K. Enyi Israeli, mtumainini Bwana.

Zina vinywa lakini hazisemi, Zina macho lakini hazioni,
Zina masikio lakini hazisikii, Zina pua lakini hazisikii harufu,

K. Enyi Israeli, mtumainini Bwana.

Mikono lakini hazishiki, miguu lakini haziendi,
Wazifanyao watafanana nazo, Kila mmoja anayezitumainia.

K. Enyi Israeli, mtumainini Bwana.

Enyi Israeli, mtumainini Bwana; Yeye ni msaada wao na ngao yao.
Enyi mlango wa Haruni, mtumainini Bwana; Yeye ni msaada wao na ngao yao.

K. Enyi Israeli, mtumainini Bwana.

Shangilio la Injili

Yn 10:14

Aleluya, aleluya
Mimi ndimi mchungaji mwema; nao walio wangu nawajua; nao walio wangu wanijua mimi;
Aleluya

Injili

Mt 9:32-39

Walimletea Yesu mtu bubu mwenye pepo. Na pepo alipotolewa, yule bubu alinena, makutano wakastajabu, wakasema, Haijaonekana hivi katika Israeli wakati wo wote. Lakini Mafarisayo wakasema, Kwa nguvu za mkuu wa pepo atoa pepo. Naye Yesu alikuwa akizunguka katika miji yote na vijiji, akifundisha katika masinagogi yao, na kuihubiri habari njema ya ufalme, na kuponya magonjwa yote na udhaifu wa kila aina. Na alipowaona makutano, aliwahurumia, kwa sababu walikuwa wamechoka na kutawanyika kama kondoo wasio na mchungaji. Ndipo alipowaambia wanafunzi wake, Mavuno ni mengi, lakini watenda kazi ni wachache. Basi mwombeni Bwana wa mavuno, apeleke watenda kazi katika mavuno yake.

Injili ya Bwana. — Sifa kwako, Ee Kristo.

Maoni (0)

Bado hakuna maoni. Kuwa wa kwanza kutoa maoni.

Ingia utoe maoni