Masomo ya Misa: Jumanne ya 16 ya Mwaka, Jumanne, 21 Jul

Somo la Kwanza

Mik 7:14–15, 18–20

Walishe watu wako kwa fimbo yako, kundi la urithi wako, wakaao peke yao, mwituni katikati ya Karmeli; na walishe katika Bashani na Gileadi, kama siku za kale. Kama katika siku zile za kutoka kwako katika nchi ya Misri nitamwonyesha mambo ya ajabu. Ni nani aliye Mungu kama wewe, mwenye kusamehe uovu, na kuliachilia kosa la watu wa urithi wake waliosalia? Hashiki hasira yake milele, kwa maana yeye hufurahia rehema. Atarejea na kutuhurumia; atayakanyaga maovu yetu; nawe utazitupa dhambi zao zote katika vilindi vya bahari. Wewe utamtimilizia Yakobo kweli yako, na Ibrahimu rehema zako, ulizowaapia baba zetu tangu siku za kale.

Neno la Bwana. — Tumshukuru Mungu.

Wimbo wa Katikati

Zab 85:1–7

K.

Ee Bwana, utuonyeshe rehema zako.

Bwana, umeiridhia nchi yako,
Umewarejeza mateka wa Yakobo.
Umeusamehe uovu wa watu wako,
Umezisitiri hatia zao zote.
Umeiondoa ghadhabu yako yote,
Umerudi na kuuacha ukali wa hasira yako.

K. Ee Bwana, utuonyeshe rehema zako.

Mungu wa wokovu wetu, uturudishe,
Uikomeshe hasira uliyo nayo juu yetu.
Je! Utatufanyia hasira hata milele?
Utadumisha ghadhabu kizazi hata kizazi.

K. Ee Bwana, utuonyeshe rehema zako.

Je! Hutaki kurudi na kutuhuisha,
Watu wako wakufurahie?
Ee Bwana, utuonyeshe rehema zako,
Utupe wokovu wako.

K. Ee Bwana, utuonyeshe rehema zako.

Shangilio la Injili

2Kor 5:19

Aleluya, aleluya,
Mungu alikuwa ndani ya Kristu, akiupatanisha ulimwengu na nafsi yake. Ametia ndani yetu neno la upatanisho.
Aleluya.

Injili

Mt 12:46–50

Yesu alipokuwa katika kusema na makutano, tazama, mama yake na ndugu zake walikuwa wakisimama nje wataka kusema naye. Mtu mmoja akamwambia, Tazama, mama yako na ndugu zako wamesimama nje, wanataka kusema nawe. Akajibu, akamwambia yule aliyempasha habari, Mama yangu ni nani? Na ndugu zangu ni akina nani? Akawanyoshea mkono wanafunzi wake, akasema, Tazama, Mama yangu na ndugu zangu! Kwa maana yeyote atakayeyafanya mapenzi ya Baba yangu aliye mbinguni, huyu ndiye ndugu yangu, na umbu langu, na mama yangu.

Injili ya Bwana. — Sifa kwako, Ee Kristo.

Maoni (2)

Boniface Jelemia · 21 Julai 2026

Nimejifunza katika injili. Inatuambia tumpende mungu tumtumikie tumjue pia tutende matendo ya mpendezayo yeye aliye juu mbinguni

Sebastian Mavukilo · 21 Julai 2026

Bwana Yesu Asifiwe sana. Tumsifu Yesu Kristo. Leo maandiko yanatukumbusha upendo mkuu wa Mungu juu ya watu wake. Anatupenda kiasi cha kutodumisha hasira na gadhabu yake juu yetu; vyote huwepo kwa muda tu na baadae huviachilia. Aliamua hata kumtoa mwanae wa pekee ili kujipatanisha nasi. Lakini kuachilia huko huja baada ya sisi kuacha njia zetu za machukizo na kumwelekea yeye. Hivi ndio tutakuwa ndugu zake Bwana wetu Yesu Kristo, kama INJILI inavyoelekeza. SALA Eeh Mungu tunaomba utuumbie mioyo mipya iliyojaa hofu na utii wa NENO lako ili uweze kutuunganisha katika familia yako. Amina.

Ingia utoe maoni