Masomo ya Misa: Dominika ya 26 ya Mwaka, Jumapili, 26 S

Somo la Kwanza

Hes 11:25-29

Bwana alishuka ndani ya wingu, akanena naye, akatwaa sehemu ya roho iliyokuwa juu ya Musa, akaitia juu ya wale wazee sabini; ikawa, roho hiyo ilipowashukia, wakatabiri, lakini hawakufanya hivyo tena. Lakini watu wawili walisalia kambini, jina la mmoja aliitwa Eldadi, na jina la wa pili aliitwa Medadi; na roho ile ikawashukia; nao walikuwa miongoni mwao walioandikwa, lakini walikuwa hawakutoka kwenda Hemani;nao wakatabiri kambini. Mtu mmoja kijana akapiga mbio, akaenda akamwambia Musa, akasema, Eldadi na Medadi wanatoa unabii kambini. Yoshua mwana wa Nuni, mtumishi wa Musa tangu ujana wake, akajibu akasema, Ee Bwana wangu Musa, uwakataze. Musa akamwambia, Je! Umekuwa na wivu kwa ajili yangu; ingekuwa heri kama watu wote wa Bwana wangekuwa manabii, na kama Bwana angewatia roho yake.

Neno la Bwana. — Tumshukuru Mungu.

Wimbo wa Katikati

Zab 19:7,9,11-13,

K.

Maagizo ya Bwana ni ya adili, huufurahisha moyo.

Sharia ya Bwana ni kamilifu,
Huiburudisha nafsi.
Ushuhuda wa Bwana ni amini,
Humtia mjinga hekima.

K. Maagizo ya Bwana ni ya adili, huufurahisha moyo.

Kicho cha Bwana ni kitakatifu,
Kinadumu milele.
Hukumu za Bwana ni kweli,
Zina haki kabisa.

K. Maagizo ya Bwana ni ya adili, huufurahisha moyo.

Tena mtumishi wako huonywa kwazo,
Katika kuzishika kuna thawabu nyingi.
Ni nani awezaye kuyatambua makossa yake?
Unitakase na mambo ya siri.

K. Maagizo ya Bwana ni ya adili, huufurahisha moyo.

Umzuie mtumishi wako asitende mambo ya kiburi,
Yasinitawale mimi.
Ndipo nitakapokuwa kamili,
Nami nitakuwa safi, bila kosa lililo kubwa.

K. Maagizo ya Bwana ni ya adili, huufurahisha moyo.

Somo la Pili

Yak 5:1-6

Haya basi, enyi matajiri! Lieni, mkapige yowe kwa sababu ya mashaka yenu yanayowajia. Mali zenu zimeoza, na mavazi yenu yameliwa na nondo. Dhahabu yenu na fedha yenu zimeingia kutu, na kutu yake itawashuhudia, nayo itakula miili yenu kama moto. Mmejiwekea akiba katika siku za mwisho. Angalieni, ujira wa wakulima waliovuna mashamba yenu, ninyi mliouzuia kwa hila, unapiga kelele, na vilio vyao waliovuna vimeingia masikioni mwa Bwana wa majeshi. Mmefanya anasa katika dunia, na kujifurahisha kwa tamaa; mmejilisha mioyo yenu kama siku ya machinjo. Mmehukumu mwenye haki mkamwua; wala hashindani nanyi.

Neno la Bwana. — Tumshukuru Mungu.

Shangilio la Injili

Yn 10:27

Aleluya, aleluya!
Kondoo wangu waisikia sauti yangu, asema Bwana; Nami nawajua, nao wanifuata.
Aleluya.

Injili

Mk 9:38-43,45,47-48

Yohane alimwambia Yesu, Mwalimu tulimwona mtu akitoa pepo kwa jina lako, ambaye hafuatani nasi; tukamkataza, kwa sababu hafuatani nasi. Yesu akasema, Msimkataze, kwa kuwa hakuna mtu atakayefanya mwujiza kwa jina langu akaweza mara kuninenea mabaya; kwa sababu asiye kinyume chetu, yu upande wetu. Kwa kuwa yeyote atakayewanywesha ninyi kikombe cha maji, kwa kuwa ninyi ni watu wa Kristo, amin, nawaambia, hatakosa thawabu yake. Na yeyote atakayemkosesha mmojawapo wa wadogo hawa waniaminio, afadhali afungiwe jiwe la kusagia shingoni mwake, na kutupwa baharini. Na mkono wako ukikukosesha, ukate; ni afahdali kuingia katika uzima u kigutu, kuliko kuwa na mikono miwili, na kwenda zako jehanamu, kwenye moto usiozimika. Na mguu wako ukikukosesha, ukate, ni afadhali kuingia katika uzima, u kiwete, kuliko kuwa na miguu miwili, na kutupwa katika jehanam. Na jicho lako likikukosesha, ling’oe, ulitupe, ni afadhali kuingia katika ufalme wa Mungu, una chongo, kuliko kuwa na macho mawili, na kutupwa katika jehanam; ambao humu funza wao hafi, wala moto hauzimiki.

Injili ya Bwana. — Sifa kwako, Ee Kristo.

Maoni (0)

Bado hakuna maoni. Kuwa wa kwanza kutoa maoni.

Ingia utoe maoni