Ijumaa ya 29 ya Mwaka

Najua ya kuwa ndani yangu, yaani, ndani ya mwili wangu, halikai neno jema; kwa kuwa kutaka nataka, bali kutenda lililo jema sipati. Kwa maana lile jema nilipendalo, silitendi; bali lile baya nisilolipenda ndilo nilitendalo. Basi kama lile nisilolipenda ndilo nilitendalo, si mimi nafsi yangu nilitendaye, bali ni ile dhambi ikaayo ndani yangu. Basi nimeona sheria hii, ya kuwa kwangu mimi nitakaye kutenda lililo jema, lipo lililo baya. Kwa maana naifurahia sheria ya Mungu kwa utu wa ndani, lakini katika viungo vyangu naona sheria iliyo mbali, inapiga vita na ile sheria ya akili zangu, na kunifanya mateka ya ile sheria ya dhambi iliyo katika viungo vyangu. Ole wangu, maskini mimi! Ni nani atakayeniokoa na mwili huu wa mauti? Namshukuru Mungu, kwa Yesu Kristo Bwana wetu.

Unifundishe akili na maarifa,
Maana nimeyaamini maagizo yako.

K. Unifundishe akili na maarifa, Ee Bwana.

Nakuomba, fadhili zako ziwe faraja kwangu,
Sawasawa na ahadi yako kwa mtumishi wako.

K. Unifundishe akili na maarifa, Ee Bwana.

Rehema zako zinijie nipate kuishi,
Maana sheria yako ni furaha yangu.

K. Unifundishe akili na maarifa, Ee Bwana.

Hata milele sitayasahau maagizo yako,
Maana kwa hayo umenihuisha.

K. Unifundishe akili na maarifa, Ee Bwana.

Mimi ni wako, uniokoe,
Kwa maana nimejifunza mausia yako.

K. Unifundishe akili na maarifa, Ee Bwana.