Masomo ya Misa: Dominika ya 18 ya Mwaka, Jumapili, 2 Ag

Somo la Kwanza

Isa 55:1-3

Haya, kila aonaye kiu, njoni majini, Naye asiye na fedha; njoni, nunueni mle; Naam, njoni, nunueni divai na maziwa, Bila fedha na bila thamani. Kwani kutoa fedha kwa ajili ya kitu ambacho si chakula? Na mapato yenu kwa kitu kisichoshibisha? Nisikilizeni kwa bidii, mle kilicho chema, Na kujifurahisha nafsi zenu kwa unono. Tegeni masikio yenu, na kunijia; Sikieni, na nafsi zenu zitaishi; Nami nitafanya nanyi agano la milele, Naam, rehema za Daudi zilizo imara.

Neno la Bwana. — Tumshukuru Mungu.

Wimbo wa Katikati

Zab 145:8-9, 15-18

K.

Waufumbua mkono wako, Wakishibisha kila kilicho hai matakwa yake.

Bwana ana fadhili, ni mwingi wa huruma,
Si mwepesi wa hasira, ni mwingi wa rehema,
Bwana ni mwema kwa watu wote,
Na rehema zake zi juu ya kazi zake zote.

K. Waufumbua mkono wako, Wakishibisha kila kilicho hai matakwa yake.

Macho ya watu wote yakuelekea Wewe,
Nawe huwapa chakula chao wakati wake.
Waufumbua mkono wako, Wakishibisha kila kilicho hai matakwa yake.

K. Waufumbua mkono wako, Wakishibisha kila kilicho hai matakwa yake.

Bwana ni mwenye haki katika njia zake zote,
Na mwenye fadhili juu ya kazi zake zote.
Bwana yu karibu na wote wamwitao,
Wote wamwitao kwa uaminifu.

K. Waufumbua mkono wako, Wakishibisha kila kilicho hai matakwa yake.

Somo la Pili

Rum 8:35, 37-39

Ni nani atakayetutenga na upendo wa Kristo? Je! Ni dhiki au shida, au adha, au njaa, au uchi, au hatari, au upanga? Lakini katika mambo hayo yote tunashinda, na zaidi ya kushinda, kwa yeye aliyetupenda. Kwa maana nimekwisha kujua hakika ya kwamba, wala mauti, wala uzima, wala malaika, wala wenye mamlaka, wala yaliyopo, wala yatakayokuwapo, wala wenye uwezo, wala yaliyo juu, wala yaliyo chini, wala kiumbe kinginecho chote hakitaweza kututenga na upendo wa Mungu ulio katika Kristo Yesu Bwana wetu.

Neno la Bwana. — Tumshukuru Mungu.

Shangilio la Injili

Yn 10:27

Aleluya, aleluya
Kondoo wangu waisikia sauti yangu, asema Bwana; Nami nawajua, nao wanifuata
Aleluya

Injili

Mt 14:13-21

Yesu aliposikia hayo, aliondoka huko katika chombo, akaenda mahali pasipo watu, faraghani. Na makutano waliposikia, walimfuata kwa miguu kutoka mijini mwao. Yesu akatoka, akaona mkutano mkuu, akawahurumia, akawaponya wagonjwa wao. Hata kulipokuwa jioni, wanafunzi wake walimwendea, wakasema, Mahali hapa ni nyika tupu, na saa imekwisha pita; uwaage makutano, waende zao vijijini, wakajinunulie vyakula. Yesu akawaambia, Hawana haja kwenda zao, wapeni ninyi vyakula. Wakamwambia, Hamna kitu hapa ila mikate mitano na samaki wawili. Akasema, Nileteeni hapa. Akawaagiza makutano waketi katika majani; akaitwaa ile mikate mitano na wale samaki wawili, akatazama juu mbinguni, akabariki, akaimega ile mikate, akawapa wanafunzi, wanafunzi wakawapa makutano. Wakala wote wakashiba; wakayaokota masazo ya vipande vya mikate, vikapu kumi na viwili, vimejaa. Nao waliokula walikuwa wanaume wapata elfu tano, bila wanawake na watoto.

Injili ya Bwana. — Sifa kwako, Ee Kristo.

Maoni (4)

Benard Pius · 2 Agosti 2026

NIMEELEWA MUNGU NI MWEMA

Kilian Kawonga · 2 Agosti 2026

Tumsifu Yesu Kristu

Rose Wafula · 2 Agosti 2026

AMINA

Sebastian Mavukilo · 2 Agosti 2026

NENO la Mungu ndio chakula kishibishacho, tunahaswa kukitafuta hicho kwa bidii kubwa ; pesa na muda wetu. Tukimtumainia Mungu, na kumtafuta kwa uaminifu basi kile chakula cha duniani atatutengenezea mazingira ya kukipata kirahisi. Tumsifu Yesu Kristo wapendwa.

Rose Wafula · 2 Agosti 2026

AMEN

Rose Wafula · 2 Agosti 2026

God is provider any Time that you want him to provide for you is available amen

Ingia utoe maoni